Info-Portal für das Schweinfurter Oberland: Schonungen – Üchtelhausen – Stadtlauringen – Thundorf – Maßbach und angrenzende Gebiete

Ja, ja dös Frühjohr is widder in Omarsch. Es wor jedz lang genuch Winder. Die Leud senn scho ganz narrisch auf schöns Wadder. In der Schdadd merksd däs än ersdn dro, däs die Schdrossecafes widder aufmochn. Bei uns aufn Land dodro, däs die erschda ofonga in ihr Gärdn rümzuhackn und ihr Miestbäider osedzn.

 

Vielleichd brouch mer unner Gärdn widder nödicher wenns sou weider ged mid dara Wirdschafdskrise. Vieleichd senn mer froh wenn mer Kardoffel obau könna, wenn doch noch ölles än Grom nei ged. Wenn da hörsd mid wie viel Gier die Bankn Milliarden verzockd hom, konns än schlachd war.

Wenn unseräns än Kredid will, da wölln die dann zwee- un dreifach ogsicherd ho, än besden gisd dera für 10 Euro a Sicherheid vo 30, däs sa jo kee gross Risiko höm.

Un selber zockn sa däs ders schlachd werd. Ümmer mehr faula Anlachn kumma zun Vorschein. Besonders die Landesbanken, bei dara unner Polidiker in die Aufsichdsräd hockn, höm sou viel Gald in Lufdnummern invesdierd, däs die Regierunga midn bezohln vo dara ihr Schuldn gor nedd nochkumma. Äs is scho a Widz däs jedz mir ölla dara ihr Schuldn bezohl sölln. Un nedd nur mir, unner Kinner un unner Enkelkinner höm noch do dro zu bezohln.

Un nedd nur däs sa äs Gald verzockd hom. Vo lauder Missdraun gechnüber änanner, rücken sa jedz kee Gald mer raus. A Undernehma muss scho än Kobfschdand moch däs sa Gald vo dara krichn üm zu invesdieren un Gschäfde zu mochn. Dabei is dös jo eichendlich ihr Aufgab. Un damid mochn sa ölles noch viel schlimmer. Monchmol frächsd da dich wos dös fer Leud sän, wu do äs sochn höm. Un ob die noch irchenwelcha Brinzipien hom. Obber wenn ich Milliona in Johr verdian däd wüsset ich vielleichd a nix mer wies bei die normola Leud zugedd. Ich hos ledzd Johr, a in Frühjohr, scho mol gschriem, däs Revoludiona genau aus solcha Gründ oganga senn. Obber wohrscheinlich denkn die, un a unner Polidiker, däs mer mid uns ölles moch konn. Bloss ich fräch mich wie lang noch.

Es gidd jo dös Schbrichword: der Deufel scheißd auf känn klenna Haufn. Wohlgemergd, der Deufel. Dös sölledn die, die ümmer mer wölln, sich amol zu Herzn namm.

Euer Angnes

Zum Seitenanfang