Info-Portal für das Schweinfurter Oberland: Schonungen – Üchtelhausen – Stadtlauringen – Thundorf – Maßbach und angrenzende Gebiete

Word är scho durt. Odder gedd är noch hie? – Wuhie?
No zu dara Ausschdellung übers Brauchdum im Schweiferder Oberland. Wenn mer scho mol zom wos auf die Bee schdelln, dann gedd mä aa hie!

Ich wor aa noch nedd dörd, obber ich gä ganz beschdimmd hie. Mir gedds nämli aa wie ölla Leud.
Där Freizeidschdräss hodd mich eighold. Jeds Wochenend und jedn Feierdoch wos anners.
Do a Fesdla, a Geburdsdoch, a Ausfluuch un wäss där Herr noch wos. O Pfingsdn hodd die Volunteer Fire Brigade vo Münsder a grouss Fesd khod, do ho ich naddürlich aa hie gemüssd, äs lichd jo in die Nochberschofd – do gedd mer hie.

Äs wor die best Party in Town – die annera Bardies ho ich nedd gfunna.
In fuchzich Johr ghörd dös aa nei a Brauchdumsausschdellung über die Fire Brigades. Äs gidd Leud die soochn, ich hädd oh ölles wos rüm zu nörgeln. Hei sou bin ich hald, ölles schüa redd konn ich nedd un mouch ich aa nedd. Dös überloss ich dä Obrich keid, die konn dös besser.
Ich finn wenn wos nedd läffd, konn mär dös sooch, und nedd sou doua als ob ölles in Ordnung wär. Die Leud sänn doch nedd blöd, die wüssn doch aa däs nedd olles ümmer nua schüa odder nur guad is – und däs monchmol wos dänahm läffd.

Und däs Fahler gemochd warn. Denn nur dar wu nix möchd, möchd kee Fahler. Un die verschdenn aa die Gründ däfür. Wos sa nedd verdrochn, is wenn sa für blöd verkeffd wärn un nix gsochd kriechn. Sou gedds denk ich momendan viela mid dann Schweiferder Oberland. Mer wess überhaubt nedd, wos läffd un wies weider gia söll. Äs hömm sich sou viel Leud än haufn Ärberd gemochd, ich denk die höm äs Rachd zu efohrn wies weider gedd un wos momendan läffd un wos der Schdand is. Un vor ollem wos midd ihr Vorschläich un ihr Ärberd werd. Un dös möglichst konkred un nedd wischiwaschi. Äs gid dös Schlochword von der „Bürgernähe“. Ich denk die wär bidder nödich. Un, liebe Obrichkeid, draud euer Bürcher wos zu, vor ollem än gsundn Menschenverschdand un Ver schdändnis für aufdauchnda Schwierichkeidn.

Euer Angnes

Zum Seitenanfang