Öiberländers Angnes - Gedds führwerds oder rückwerds?

Na hobt er die Kermesen alle gut überstanden, seid er bereit für die Weihnachtsfeiern und die Weihnachtsmärkt?

Manchmal hob ich dann Eindruck, es geht nur noch üms Essen und üms Trinken. Die junga Leud sochn jo nedd Weihnachtsmarkt, sondern Glühweinmarkt, deswegen genn sa nämlich dort hie.

Ober ich will nedd scho widder rümm unk über die ach so schöne Weihnachtszeit. Heut will ich amol wos Poisitivs schreib.

Höbt ers gelasn, die Schonunger kriechn jetz a Realschul? Dös is doch endlich mal was erfreulichs, damit die Schuln aufm Land a widder a Schangs bekomma, weiter zu existiern.

Däs die Hauptschüler vo Schonunga dafür nach Gochsum oder Sennfeld müssn, ist des weniger Schöna.

Dös hässt doch, des a Haupschüler aus Reichmannshausn bis nach Gochsum gekarrt wer muss!

Ja wos is denn mit dann Schweiferter Oberland? Wärüm gibt¹s denn kenn Schulverband Schweinfurter Oberland? Konn mer dänn do nix gemoch, damit die Kinner nedd durch enn halben Landkreis gfohrn war müssn?

Die Reichmannshäuser, Löffelsterzer usw. nach Gochsum, die Ebertshäuser, Hesselbacher usw. nach Dittelbrunn vielleicht a noch Oerlenbach oder Schweifert, die Oberlauringer, Münsterer usw. nach Hofheim oder vielleicht a noch Maroldsweisach. Da möichst da doch manchmal gsoch: “Herr schmeiß Hirn vom Himmel!" Aber wahrscheinlich kapier ich bloß die größern Zusammenhänge nedd.
Bewecht sich denn noch wos in dann Schweinfurter Oberland, oder kocht jede Gemee ihr eichns Süppla, und hat Angst die annera könnten irchendwie besser weg kumm?

Um wos gedds denn? Doch um bessere Lebensqualität und bessere Zukunftschancen für die Menschen in die Dörfer!

Däs wos führwerds gedd un nedd rückwerds!

Wärs des nedd wert über den eichene Kirchturm nauszuschaun und a mol wos ungewöhnliches zu machen?

Obber ihr merkt scho ich unk scho widder.

Wohrscheinlich konn ich nedd anners, ich bin halt a alta Unken.

Trotzdem frohe Weihnachten und enn guten Rutsch
Euer Angnes